Qisqacha
- Hyperscale Data o‘zining Michigan shtatidagi ma’lumot markazini kengaytirishni qo‘llab-quvvatlash uchun Bitcoin zaxiralarining aksariyatini sotdi.
- Kompaniya qariyb 685 Bitcoinni taxminan 43 million dollarga sotdi.
- Hyperscale taxminan 275 Bitcoinni saqlab qoldi va ushbu kriptovalyutani qazib olishni davom ettirishni rejalashtirmoqda.
Hyperscale Data Michigan shtatidagi ma’lumot markazini kengaytirishni moliyalashtirish uchun o‘zining Bitcoin zaxiralarining aksariyat qismini sotib yubordi.
Juma kuni e’lon qilgan bayonotida Las-Vegasda joylashgan, NYSE American’da GPUS tikeri ostida savdo qiluvchi kompaniya, taxminan 685 Bitcoinni 43 million dollar atrofida sotganini ma’lum qildi.
Hyperscale bu mablag‘lardan asosan Michigan’dagi obyektni rivojlantirish va kengaytirishni davom ettirish uchun foydalanishni rejalashtirayotganini bildirdi. Sotuv kompaniyaga qarz, kapital va umumiy kapital tuzilmasini boshqarishda ham ko‘proq moslashuvchanlik beradi. Kompaniyaga ko‘ra, u o‘zining taxminan 30 million dollarga yaqin qarzini qisqartirgan.
Hyperscale’ga ko‘ra, ushbu sotuv “kapitalni taqsimlash haqida.”
“Bizda katta Bitcoin portfeli mavjud va bugun biz ushbu yuqori likvidli aktivning bir qismini kompaniyamiz portfelidagi eng muhim aktivlardan birini rivojlantirishni tezlashtirish uchun kapitalga aylantira olishimiz bizga nasib etdi,” — dedi kompaniya raisi Milton Ault o‘z bayonotida. “Bizning fikrimizcha, bu Hyperscale Data va uning aksiyadorlari uchun kompaniya rivojlanishining ushbu bosqichida to‘g‘ri qaror.”
Hyperscale hozirda 275 Bitcoin saqlab turibdi, sotuvgacha bu raqam taxminan 960 BTC edi.
Aultning so‘zlariga ko‘ra, sotuv kompaniyaning Bitcoin strategiyasining yakuni emas, Hyperscale Bitcoin qazib olishni davom ettirishni rejalashtirayotganini va vaqt o‘tib, qazib olish orqali olingan Bitcoin va mavjud kapital orqali o‘z zaxiralari miqdorini qayta tiklashlari mumkinligini, bu holat bozor sharoitlariga qarab amalga oshirilishini ta’kidladi.
"Bitcoin Hyperscale Data’ning strategiyasida muhim rol o‘ynagan va biz u kelgusida ham strategiyamizning muhim qismi bo‘lib qolishiga ishonamiz," — dedi u.
Michigan’dagi obyekt Hyperscale’ning AI uchun infratuzilmaga o‘tishida asosiy rol o‘ynaydi. Uning Sentinum sho‘ba korxonasi orqali kompaniya ma’lumot markazini boshqaradi, raqamli aktivlarni qazib oladi va AI kompaniyalari hamda boshqa bizneslar uchun kolokatsiya va hosting xizmatlarini taqdim etadi.
Mart oyida VanEck raqamli aktivlarni tadqiq qilish bo‘limi rahbari Matthew Sigel, qazib oluvchilar “oltin konida o‘tirishganini” aytgan edi, chunki ular mavjud obyektlarni AI uchun qayta yo‘naltira oladi va an’anaviy ma’lumot markazlari kompaniyalariga nisbatan katta chegirma bilan savdo qilmoqda.
“Bu qazib oluvchilar kapital qiymati nuqtai nazaridan, o‘z faoliyatini qayta yo‘naltirish orqali daromad olishlari mumkinligini erta anglagan edilar”, — dedi u
